Хоол ундаагаар үйлчлэх арга техник

Зочдын хоол ундааны үйлчилгээг мэргэжлийн түвшинд сайн явуулах үндэс нь төрөл бүрийн хоол ундааг олгох журам, дэс дараалал, арга барил, ажилбарыг сайтар эзэмшсэн байх явдал юм.

Хүйтэн зууш олгох. Хүйтэн зууш нь хооллох хүслийг улам сэргээдэг учраас өнгө үзэмжтэй, сайхан байх ёстой. Хүйтэн зуушийг дор дурьдсан дэс дараалалаар олгоно. 1. Загасан бүтээгдэхүүн /түрс, загас, шпрот г.м/ 2. Өөрийн үйлдвэрлэсэн загасан зууш 3. Махан бүтээгдэхүүн 4. Өөрийн үйлдвэрлэсэн махан зууш 5. Шинэ ногоо 6. Салат 7. Бяслаг

Хүйтэн зууш салатыг олгох үеийн температур 14 орчим хэмтэй байх ба цөцгийн тос царцанги байдалтай байна. Шинэ ногоог салатны таваг, мөстэй хамт олгож болно. Хүн бүрт тавганд хүйтэн зууш олгохоор төлөвлөсөн бол зуушны тавганд, хүлээн авалт, дайллагын үед ширээний дунд тавихаар бол шаазан болон металл дугуй, зуйван тавганд хийж олгоно. Зууш аягалахдаа зуушны төрлөөс хамааруулж хоолны буюу халбага сэрээг хэрэглэдэг. Түүнчлэн загас, түрс, нухшинд хусуур, салатны багаж, хавчаар зэргийг хэрэглэж болно.

Халуун зууш олгох. Халуун зуушийг ихэвчлэн жижиг хайруул, шанага шилэн сав болон зориулалтын савтай нь олгодог.

Шөлтэй хоол олгох. Шөлтэй хоолыг зуушны дараа олгоно. Шөлтэй халуун хоолыг олгох температур 74 хэм, хүйтэн шөл 7-14 хэм байна. Харин өндгөөр зутагнуулсан шөлийг олгох үеийн температур 64 хэм байж болно. Шөлийг бэлтгэсэн технологи ажиллагаагаар нь тунгалаг, холимог, зутан, сүүтэй, хүйтэн жимсний гэж ангилдаг. Шөл олгоx сав нь шөлний төрлөөс хамаарч өөр өөр байна. Шөлийг шөлний аяганд, шөлний саванд олгодог. Зарим нэг үндэсний шөлтэй хоол, холимог шөл, борш зэргийг хийж бэлтгэсэн шавар, ваар савтай нь олгодог.

Үндсэн хоол олгох. Рестораны үйлчилгээнд санал болгож байгаа үндсэн хоолнууд / хоёрдугаар / бэлтгэх түүхий эд, дулааны боловсруулалтын аргаар олон төрөл зүйлтэй байдаг. Үндсэн хоолыг олгох дэс дараалал: 1. Загасан 2. Махан 3. Тахиа, шувууны махтай 4. Ногоотой 5. Будаатай 6. Өндөгтэй 7. Сүүтэй 8. Гурилан Завсрын аль нэг хоол байхгүй үед ч энэ дарааллаар олгоно. Үндсэн хоолыг 65 хэм, түүнд дагалдах сүмсийг 75 хэм, захиалгат хоолыг 80-90 хэмтэй олгодог. Халуун хоолыг олгохын өмнө тавгийг 40-45 хэм хүртэл халаасан байх шаардлагатай.

Согтууруулах ундаа олгох. Согтууруулах ундааг зохицсон хоолтой хамт хэрэглэхэд түүний амт шимт илүү тод илэрдэг. Иймээс хоол ундаа хоёрын зохицолдох зарчмыг мэдэх шаардлагатай байдаг. Үүнд: • Зуушинд хатуу архи, хатуу дарс дагуулах илүү тохиромжтой. Зарим зайдас, хавч зэрэг халуун зууш, бяслаг, хавчны махтай хүйтэн зуушинд пиво дагалдуулна. • Гахай тугал тахианы зэрэг халуун хоолонд хуурай цагаан дарс дагалдуулна. • Үхэр, хонь, ангийн шувуу зэрэг амьтны мах, нугас, галуу зэрэг бараан өнгийн махан халуун хоолонд улаан дарс агуулна. • Загасан хоолонд зөөлөн цагаан дарс дагуулна. • Ногоотой хоолонд зөөлөн амтлаг, хүчиллэг сул, амтлаг дарс дагуулна. Хэт чихэрлэг нялуун хоолонд амтлаг дарс дагуулахгүй байх хэрэгтэй. • Хэрэв тухайн хоолыг дарсаар амталж хийсэн бол тэрхүү дарсыг олгоно. • Нутгийн хоолонд нутгийн дарс тохирдог. • Цуугаар амталсан салат, карри сүмстэй мах, шоколадтай амтлаг хоолыг дарсаар даруулж болдоггүй, учир нь эдгээр амт хоорондоо зохицдоггүй. • Хар кофенд коньяк эсвэл ликёр дагуулна. Тэрчлэн коньяк нимбэг, байхуу цай, жимстэй илүү зохицдог. • Ширээнд олон нэрийн дарс олговол шинэхэн дарсыг хуучин дарснаас өмнө, хуурай болон хагас хуурай дарсыг амтлаг болон ликёрны өмнө, сул дарсыг хатуу дарсны өмнө, цагаан дарсыг улаан дарсны өмнө олгох ёстой. Ундааг зориулалтын хэлбэр, хэмжээ, багтаамж, өнгөтэй шилэн саванд олгосноор түүний амт, өвөрмөц үнэр нь илүү сайн ялгаран мэдрэгддэг.

Ундаа олгох шилэн савны багтаамж нь түүний хатуулгаас хамааран хатуулаг их байх тусам савны багтаамж бага байна. Харин дарсны шилэн хундаганы өнгө тунгалаг байх ёстой. Согтууруулах ундааны амт үнэрийг илүү тод мэдрэхэд түүнийг олгох үеийн температур гол үүрэгтэй байна. Хүснэгт 6-д төрөл бүрийн ундааны олгох үеийн температурыг харуулав. Согтууруулах ундааг олгоход цаг улирлын байдал ихээхэг нөлөөтэй. Халуун дулаан өдрүүдэд зөөлөн амттай цагаан хуурай дарс, өвлийг цагт улаан дарс, хатуу дарс, коньяк илүү тохиромжтой байдаг. Согтууруулах ундааг олон хүний дунд олгохдоо шилтэй нь харин нэг хүнд олгохдоо шилэн саванд хийж ширээн дээр тавьдаг. Хундагалахад эвтэй байлгахын тулд графиныг ¾ хүртэл дүүргэнэ. Зөөгч захиалсан ундааны зүйлийг олгохыг өмнө зочдод үзүүлэх ёстой. Зочинд шилтэй ундааны зүйлийг шошгыг харуулж, захиалсан ундаа мөн гэдгийг баталгаажуулна. Ундааны зүйлийг зочны зөвшөөрлөөр дэргэд нь онгойлгоно. Дарсыг зочинд амсуулах үүднээс бага зэрэг хундгалж өгнө. Зочин хундгатай дарсын гэрэлд барьж түүний өнгө, тунгалаг байдлыг шинжээд, дарсыг амтална. Дарс амталсан хүний зөвшөөрлөөр бусад зочдын хундагануудад хийж хамгийн сүүлд нь түүний хундаганд хийдэг.Олон зочинд үйлчилж байгаа тохиолдолд дарсыг амсуулах шаардлагагүй байдаг.

start=-49 , cViewSize=50 , cPageCount=1

1 сэтгэгдэл:

null
ganaa (зочин)

good

Сэтгэгдэл үлдээх



(нийтэд харагдахгүй)

(оруулах албагүй)
(HTML синтакс зөвшөөрөгдөөгүй)


(Зурган дээрх тоог оруулна уу)